Mae Joe Cordina yn bwriadu cywiro hanes

Mae Joe Cordina eisoes yn un o fawrion bocsio Cymru, ond i’r cyn-Olympiad, mae ‘na rywbeth ar goll. Cyn ei ornest sydd ar ddod, mae Cordina yn ysu am ennill yn ôl y gwregys uwch bwysau plu’r WBF nad yw’n credu dylai fyth fod wedi’i golli.

Roedd Cordina wedyn i fod i amddiffyn ei wregys yn erbyn ei wrthwynebydd presennol, Shavkatdzhon Rakhimov, ym mis Tachwedd 2022, ond bu’n rhaid i’r bocsiwr Cymreig gael llawdriniaeth ar ei law anafedig y mis Hydref hwnnw, fis cyn y gornest deitl.

Cafodd y gwregys ei thynnu o Cordina ar ôl iddi fod yn amlwg na fyddai’n barod i ymladd mewn pryd.  Cymerodd Rakhimov y gwregys IBF a oedd yn wag ar y pryd ar ôl curo Zelfa Barrett ar is-gerdyn Dmitry Bivol a Gilberto Zurdo Ramirez ym mis Tachwedd, yr un noson yr oedd iddo fod ymladd yn erbyn Cordina.

Ar ôl yr hyn sydd wedi bod yn gyfnod anodd i’r bocsiwr, mae’n gobeithio mai nawr yw ei amser i ailysgrifennu’r gorffennol. Yn ddiguro mewn 15 o ornestau proffesiynol a gyda naw ergyd loriol, mae’r Dewin Cymreig yn anelu at gywiro’i sefyllfa ac ennill y gwregys yn ôl, y gwregys mae’n credu sy’n haeddiannol iddo. Ac mewn tro annisgwyl, bydd yn ymladd yn erbyn neb llai na Rakhimov yn ei ddinas enedigol, Caerdydd, ar Ebrill 22.

O ran ei wrthwynebydd, dywedodd Cordina: “Fe yw’r pencampwr ond dwi’n mynd i mewn i’r gornest yn hyderus. Mae gen i’r profiad o fod yn bencampwr byd; dydw i heb golli unrhyw wregys yn y ring.

“I lot o bobl, dwi dal yn bencampwr, ond bydd rhaid i fi fod ar fy ngorau. Dwi’n meddwl mod i’n gallu ei drechu. Os ydw i’n llwyddo glanio’r ergyd iawn, a dwi’n meddwl y byddaf, yna mae wastad posibilrwydd y gallaf ei drechu.

“Rwyf wedi gweld bocswyr eraill yn ei frifo; achosodd JoJo Diaz (Joseph Diaz Jnr) broblemau iddo gydag ergydion corff. Dwi’n gallu dyrnu a phan dwi’n glanio ergyd, dwi’n mynd i dy frifo di, felly mae’n bendant gen i’r offer i ennill y gornest hwn.

“Mae llawer iawn o barch yno, mae wedi cyrraedd safle teitl pencampwr y byd ac yna gorffennodd e fyny mewn gornest am deitl gwag.

“Mae’n ymladdwr da; mae e’n galed, yn gryf, ac yn ffit. Ond dwi wastad wedi dweud bod yn rhaid i chi gael ychydig bach mwy na hynny i’m curo i.

“Mae’n rhaid i chi gael ychydig bach o bopeth.  A dwi heb ei weld yn dangos i mi fod ganddo ymennydd bocsio da iawn.

“Mae mawrion y gamp ar y brig gan eu bod yn defnyddio eu hymennydd; dydyn nhw ddim yn ceisio sefyll wyneb yn wyneb pryd bynnag maen nhw gyda rhywun sy’n gryfach yn gorfforol na nhw.

“Maen nhw’n defnyddio’u gallu a deallusrwydd bocsio i symud i sefyllfa fel eu bod nhw’n gallu taro eu gwrthwynebydd a pheidio cael eu taro’u hunain. A dyna dwi’n bwriadu ei wneud ar Ebrill 22.”

Yn ffodus i Cordina, ni fu unrhyw broblemau gyda’i law y tro hwn wrth iddo baratoi ar gyfer ei ornest deitl sydd ar ddod.

Ar ôl iddo gael ei orfodi i ildio’r gwregys pwysau plu IBF yn dilyn ei anaf i’w law nôl ym mis Hydref 2022, roedd Cordina yn teimlo fel bod popeth wedi cael eu dwyn oddi wrtho. Ar ôl gweithio ar hyd ei oes i ennill teitl byd, mae Cordina’n disgrifio gweld y cyfan yn llithro i ffwrdd mewn chwinciad pan oedd mewn gwersyll ymarfer.

Yn ei sesiwn sbario gyntaf, yn y dyrniad cyntaf un a daflodd, roedd yn gwybod bod rhywbeth o’i le.

“O’n i’n gwybod mod i wedi gwneud rhywbeth yn syth.  Camais yn ôl, gwasgu fy nyrnau, a gallwn deimlo rhywbeth yn popian yn fy llaw. Es i’n syth i weld llawfeddyg.

“Doeddwn i ddim yn siŵr pa mor hir fyddai’n cymryd i wella, a doedd gen i lawer o amser. Roeddwn i eisiau mynd yn syth nôl allan, ond roeddwn i’n gwybod y byddai ond yn gwaethygu, neu byddai’n digwydd eto.

“Yr wythnosau hynny cefais fy hun mewn lle eithaf tywyll.  Doeddwn i ddim yn siŵr beth oedd yn mynd i ddigwydd nesaf, a oeddwn i’n mynd i barhau i focsio neu orfod cael swydd arall. Roeddwn i’n meddwl y gallai hynny fod wedi bod yn ddiwedd ar fy ngyrfa.

“Ond wedyn wnes i siarad gyda fy nhad a fy ngwraig, mae’r ddau wedi bod yno drwy gydol fy ngyrfa ac wedi gweld yr holl aberthau dwi wedi mynd trwyddynt.

“Roedden ni’n gwybod y byddai’n cymryd amser a byddai’r cynnydd yn rhwystredig, ond dyma dwi’n caru ei wneud.  Dyna pam dwi’n codi yn y bore, i edrych ar ôl fy nheulu.”

Nod Cordina erioed oedd dod â’r gamp i Gymru. Yn sicr, nid yw wedi siomi hyd yma ac mae’n gobeithio parhau â’i gyfnod proffesiynol i’r Gwanwyn eleni.

“Dechreuais i ar yr un diwrnod ag Anthony Joshua yn GB felly i mi weld sut mae e wedi symud ymlaen a beth mae e wedi mynd ymlaen i’w wneud… Ymladdais ar ambell un o’i is-gardiau, a gallwn weld yn union beth mae’n ei gymryd. Rwyf am roi’r cyfle hwnnw i focswyr ifanc nawr.

“Roedd ennill y teitl yn dod ag atgofion yn ôl o’r teithio yn ôl ac ymlaen i Sheffield, yn gweithio o ddydd i ddydd i dîm GB,” ychwanegodd y gŵr 31 oed. Roedd e’n foment enfawr i fi, yn enwedig bod yn fy nhref enedigol, ar fy stepen drws, o flaen fy nheulu a ffrindiau.  Mae’n rhywbeth na fydda i byth yn ei anghofio.”

Bu taith y bocsiwr yn aruthrol, gan ennill medal efydd yng Ngemau’r Gymanwlad 2014 dros Gymru yng Nglasgow, cyn cipio’r aur ym Mhencampwriaethau Amatur Ewrop 2015 a chynrychioli Prydain Fawr yng Ngemau Olympaidd Rio 2016.

Ers troi’n broffesiynol, mae’r bocsiwr o Gymru wedi cael effaith enfawr.  Mae’n debyg bod Cordina wedi gweld y cyfan ond yn mynnu ei fod yn teimlo’n well nag erioed wrth iddo ef a’i hyfforddwr, Tony Sims, geisio dyfeisio strategaeth cyn ei ornest deitl sydd ar ddod.

“Dwi wastad yn ceisio gwella, wastad yn chwilio am y lefel nesaf yna.  Mae fy hyfforddwr yn nodi fy rhaglen ymarfer, a beth bynnag mae’n ei ddweud, rwy’n ei wneud. Mae’n gwybod pryd i gynyddu’r hyfforddiant

“Mae e wedi ei wneud cannoedd o weithiau. Mae wedi hyfforddi pencampwyr y byd ac mae’n gwybod sut i gael bocswyr yn barod am ornest deitl y byd. Mae’r gwersyll wedi bod yn anghredadwy.  Dwi’n mwynhau fy ymarfer ar hyn o bryd; Dwi’n mynd i gyrraedd y brig ar yr adeg berffaith.

“Mae ymarfer bob dydd yn codi ofn ar rai pobl. Peidiwch â’m cam-ddeall, mae’n codi ofn arna’i hefyd, ond ar yr un pryd, dwi’n hapus. Dwi’n hapus gyda lle dwi wedi cyrraedd a dwi’n hapus gyda’r dilyniant dwi’n ei wneud yn y gampfa. Dwi mewn lle da.

“Pan es i gyda Tony am y tro cyntaf, ro’n i’n gwybod yn syth ei fod yn rhywun ro’n i eisiau bod gyda nhw.  Wnaeth e ddim gadael i mi ddyrnu bag bocsio am wythnos, roedd y cyfan yn focsio cysgod, achos mae’n dweud mai dyna sut ti’n gweld camgymeriadau pobl a gweld sut maen nhw’n symud i ffwrdd oddi wrth rywun.

“O fy ornest gyntaf, dwi wedi symud ymlaen.  Nes i frwydro am deitl WBA yn fy chweched gornest. Rwyf wedi symud ymlaen i’r teitlau Prydeinig, teitlau’r Gymanwlad, a theitlau rhyng-gyfandirol i gyrraedd lle ydw i heddiw.

“Mae hi wedi bod yn daith hir, ond mae cymaint o ddysgu mae’n rhaid i chi ei wneud.  Mae’r cam i fyny i lefel broffesiynol yn enfawr, ond mae’n rhaid i chi barhau i wella.  Mae gan bawb eu llygaid arnoch chi ac os oes gennych chi un hollt yn eich arfwisg, byddwch yn cael eich cosbi.

“Mae gen i fwy i’w ddysgu fel bocsiwr o hyd.  Dwi ddim yn meddwl bod yna focsiwr sy’n berffaith, mae wastad lle i wella.”