Mae rheolwr Cymru, Rob Page, yn credu y bydd ymgyrch ragbrofol Pencampwriaeth Ewrop 2024 yn cynnig cyfleoedd newydd i’w dîm Cymreig ar ôl ymadawiad dau o fawrion Cymru.

Dros y misoedd diwethaf, mae pêl-droed yng Nghymru wedi derbyn ergydion enfawr gyda’r newyddion am ymddeoliad Gareth Bale a Joe Allen.

Mae Page nawr yn disgwyl i’r grŵp ieuenctid barhau â thaith anhygoel Cymru, gan gystadlu ar y lefel uchaf ym mhêl-droed y byd, wrth i Gymru baratoi i herio Croatia a Latfia yn yr uwch gemau dynion cyntaf byddant yn chwarae ers Cwpan y Byd ym mis Tachwedd.

Yn ystod y degawd diwethaf, mae pêl-droed Cymru wedi bod ar daith ryfeddol.  Nôl yn 2011, roedd Cymru ar safle 112 yn y byd ac yn wynebu brwydr hir i ddod allan o fyd disylw, gan ddechrau gweld y golau yn 2016 pan gyrhaeddon nhw rownd gynderfynol yr Ewros.

Ers hynny, mae tîm y dynion wedi cystadlu mewn dau brif bencampwriaeth ryngwladol, yn gyntaf yn Ewros 2020, ac yna’n cymhwyso i gyrraedd Cwpan y Byd yn 2022 am y tro cyntaf ers 64 mlynedd.

Adeiladwyd y llwyddiant hwnnw ar gynllunio manwl a gweledigaeth gyffredin Cymdeithas Bêl-droed Cymru; er mwyn canolbwyntio ar gynhyrchu a datblygu talentau ifanc, cyn eu profi ar y llwyfan rhyngwladol o oedran cynnar.

Mae Cymdeithas Bêl-droed Cymru wedi gwneud gwaith ardderchog dros y blynyddoedd diwethaf wrth ddatblygu rhai fel Gareth Bale, Aaron Ramsey, Chris Gunter a Wayne Hennessey, ac yn fwy diweddar mae pobl fel Ethan Ampadu, Joe Rodon a Brennan Johnson hefyd wedi dod allan o’r system lwybrau.

Mae rheolwr Cymru nawr yn gobeithio y bydd y diwylliant, y llwyddiant a’r meddylfryd buddugol o’r blynyddoedd diwethaf hyn yn dylanwadu ar y genhedlaeth nesaf wrth iddyn nhw geisio parhau ag oes aur pêl-droed Cymru.

Ynglŷn â’r hyn y gall ei dîm cymryd o’u hamser yng Nghwpan y Byd Qatar 2023 wrth symud ymlaen, dywedodd Page:  “Wrth fynd i mewn i Gwpan y Byd roedden ni’n gwybod y byddai’n gofyniad mawr ar y chwaraewyr ac yn her i fynd allan o’r grŵp. Rwy’n credu ein bod ni gyd wedi mynd bach yn rhy frwd.

“Gallwn ond dysgu o’r mathau hyn o brofiadau, efallai mai fy mhenderfyniadau tactegol i oedd e. Efallai roeddwn i braidd yn naïf, er enghraifft yn synied yn rhy isel tîm Iran gyda dim ond un maeswr canol ac â meddylfryd ychydig yn rhy ymosodol.

“Dwi wedi cael amser i fyfyrio gyda’r hyfforddwyr ac fe fyddwn yn sicr yn gwneud hynny gyda’r chwaraewyr hefyd.

Wedi dweud hynny, mae Cwpan y Byd wedi bod yn brofiad gwych i rai o’r chwaraewyr iau.  Byddant wedi dysgu llawer o’r mathau hyn o brofiadau.

“Does dim angen newidiadau enfawr i’r 11 cychwynnol, yn amlwg gan gofio am ymddeoliad Gareth Bale a Joe Allen. Efallai y byddwn yn gweld rhai newidiadau yn rhai o chwaraewyr y garfan nawr.

“Rwy’n gwybod am ffaith bod ganddyn nhw’r chwant hynny i barhau i gymhwyso ar gyfer y twrnameintiau mawr hyn, oherwydd dyna maen nhw wedi arfer ag ef.”

Er nad yw Page yn disgwyl gwneud newidiadau enfawr i’w ochr ar gyfer gemau Rhagbrofol Pencampwriaeth Ewrop sydd ar ddod yn erbyn Croatia a Latfia Gwanwyn eleni, does dim dwywaith amdani fod ymadawiad Bale ac Allen yn gadael bwlch yn y tîm na fydd yn cael ei ddatrys dros nos.

Daeth y ddau chwaraewr â’u gyrfaoedd rhyngwladol eu hunain i ben yn dilyn perfformiad sobreiddiol Cymru yng Nghwpan y Byd, gan orffen ar waelod Grŵp B a gadael Qatar gydag un pwynt allan o gamau’r grŵp. Bydd Allen yn parhau i chwarae i glwb pêl-droed Abertawe ond i Bale, mae’r cyhoeddiad yn arwydd o ddiwedd ei yrfa chwarae.

“Dydw i ddim yn credu eich bod gallu gorffen ar fwy o nodyn cadarnhaol na helpu eich gwlad i fod yn gymwys ar gyfer Cwpan y Byd. Mae’n fraint i mi fy mod wedi chwarae rhan yn eu gyrfaoedd. Pan rydych chi’n gweithio gyda nhw’n agos ac yn gweld sut maen nhw’n cynnal eu hunain fel dynion a sut maen nhw fel chwaraewyr, mae’n anhygoel,” nododd Page.

“Dwi mor lwcus fy mod i wedi cael y cyfle i weithio gyda nhw. Mae’r hyn maen nhw wedi’i wneud dros bêl-droed yng Nghymru yn anhygoel a dylid eu cymeradwyo am hynny.

“Fe wnes i siarad gyda’r ddau chwaraewr am eu penderfyniad.  Doedd o ddim yn benderfyniad hawdd i’w wneud iddyn nhw, ond dwi’n ei ddeall yn llwyr. Maen nhw bellach wedi cyrraedd oed lle mae ganddynt eu hiechyd, eu cyfoeth ac maen nhw’n gallu mynd i fwynhau bywyd gyda’u teuluoedd ifanc.

“Byddan nhw’n dal i gefnogi Cymru.  Siaradais â Gareth yn arbennig a byddaf yn dal i gael sgyrsiau gydag ef am rai o’r penderfyniadau rydym yn eu gwneud gan ei fod mor angerddol â hynny am hyn ac mae am gymryd rhan o hyd.

“Ddylen nhw ddim difaru o gwbl a dylent fod yn falch iawn o’r hyn maen nhw wedi’i wneud dros bêl-droed Cymru. Roedden nhw’n gymeriadau mawr ac yn ddylanwad mawr yn yr ystafell newid, ond rydyn ni wedi cael eraill sydd wedi bod yno drwy’r llwyddiant.  Mae angen rhai o’r cymeriadau hynny o gwmpas i gefnogi’r chwaraewyr iau sydd ar y gweill.”

Yn sicr mae gan reolwr Cymru ei lygaid ar y dyfodol, lle mae’n gobeithio y bydd ei berthynas gref gyda’i gyn cyd-chwaraewr rhyngwladol a rheolwr dynion newydd dan 21, Matty Jones yn talu ar ei ganfed wrth iddyn nhw ganolbwyntio ar ddatblygiad ieuenctid.

Bydd ffocws o’r newydd ar y trefniant ieuenctid yn hollbwysig i bêl-droed Cymru yn y dyfodol. Bydd Page yn cadw llygad barcud ar y chwaraewyr yn y llwybr drwy gynnal dwy garfan, gyda chymysgedd o chwaraewyr uwch garfan a chwaraewyr dan 21 yn dilyn diwedd tymor Pencampwriaeth Cynghrair Pêl-droed Lloegr gyda gemau Mehefin i’r ddau dîm mewn golwg.

“Weithiau rydych chi’n mynd ymlaen dau gam ac yn ôl un cam, dyna sut oedd Cwpan y Byd yn teimlo, a gobeithio y bydd yn ein rhoi mewn sefyllfa dda ar gyfer y dyfodol. Felly byddwn ni’n mynd amdani i gael canlyniad a pherfformiad positif yn y gêm gyntaf.”

“Bydd yn broses; does dim byd wedi’i warantu mewn pêl-droed a bydd camgymeriadau’n cael eu gwneud. Beth sydd gennym nawr yw grŵp sydd â chwant am lwyddiant; sydd wedi bod mewn tri thwrnamaint ers 2016. Fel grŵp o chwaraewyr, nid yw’n obaith cymhwyso bellach, mae yna ddisgwyl nawr i hynny ddigwydd.

“Mae’n gyfle i ddechrau o’r newydd nawr.  Dechreuwn eto ym mis Mawrth a does dim ffordd well o ddechrau na Croatia.

“Mae fi a Matty (Jones) ill dau yn angerddol am ddatblygu’r grŵp nesaf yma o chwaraewyr i fod yn uwch dîm Cymru,” meddai Page.

“Er mwyn ein helpu i gyflawni hynny, dwi angen llygaid ar fy uwch dîm, ond mae angen i mi hefyd weld sut mae’r rhai 21 yn datblygu.

“Rhywbeth sydd angen i ni wella arno yw cael mwy o ddylanwad ar chwaraewyr yn ystod eu hamser gyda’u clybiau. Mae angen i ni wybod, pan fyddan nhw’n dod i’r gwersyll, bo nhw’n gwybod beth yw’r disgwyl o safbwynt corfforol a safbwynt technegol.

“Gyda rhai o’r staff rydyn ni’n dod â nhw i mewn, bydd hynny’n rhan o’u swydd, yn sicr gyda’r chwaraewyr, i wneud yn siŵr eu bod nhw yn y cyflwr cywir.”

Mae llawer o obaith o ran Brendan Johnson, sy’n dechrau cael ei alw’n y Gareth Bale nesaf gan lawer, ar ôl dechrau gwych i’w yrfa hyd yma.

Mae Page yn mynnu ei fod yn fwy na hyderus y gall ymosodwr Nottingham Forest bod yn barod i weithredu’n syth, ac mae hyd yn oed yn credu y gallai ei orau fod yn uwch na’r disgwyl, yn enwedig ar ôl chwarae ochr yn ochr â phobl fel Bale ac Aaron Ramsey.

“Mae’n debyg bod ganddo fwy o ddatblygiad o’i flaen hefyd, ond mae’n gwneud yn dda iawn ar y lefel uchaf ac yn profi ei werth, felly mae hynny’n obaith cyffrous.

“Mae’n gyfle i eraill, mae Jordan (James) wedi cael rhywfaint o amlygiad, ie naeth e ddim chwarae cymaint o funudau ag yr hoffem yn y Bencampwriaeth ond, yn y tymor hir, mae ganddo ddyfodol da o’i flaen.

“Mae pobl fel Ramsey yn mynd i fod yn hollbwysig wrth helpu’r chwaraewyr iau.  Aaron (Ramsey) yw un o’r chwaraewyr gorau i mi weithio gyda nhw.  Mae ganddo lawer i’w gynnig o hyd, bydd yn rhaid i ni reoli ei lwyth gwaith gan nad ydw i’n credu y bydd yn gallu chwarae pob munud o bob gêm.

“Mae’n chwarae’n dda iawn i Nice ar hyn o bryd ac i mi mae’n mynd i fod yn ddylanwad enfawr ar y chwaraewyr iau sy’n dod i mewn.

“O weld sut mae’n ymarfer, o weld y rhesymau pam ei fod yn dal i allu gwneud yr hyn mae’n ei wneud, rwyf am iddo fod yn ddylanwad cadarnhaol ar y chwaraewyr hynny.”

Y peth anodd am newid mewn pêl-droed rhyngwladol yw rheoli amlygiad y chwaraewyr iau.  Bydd rhai o’r rhai y gofynnir iddynt ymuno â’r gwersyll yn cael eu taflu’n syth i’r dwfn. Dyna yw natur y gêm.

Roedd Rob yn bleser i’w gyfweld, ac edrychwn ymlaen at siarad ag ef eto mewn rhifynnau yn y dyfodol.